金手指：2014最好炒乜？

喺2013年最後一日，孫柏文為大家fan屎做一做前瞻。至於2013年叫過嘅「一注獨贏」及「不問價追」建議，會喺下個禮拜二嗰篇同大家update同總結。

2013年同之前幾年一樣，央行妖孽當道。不過去到下半年，之前全球乜嘢資產都同步郁嘅局面開始大變，淨係睇新興市場同美股走勢分別已經feel到。之前全球資產價格一齊郁，只係反映量價把「貨幣尺」縮短放長。不過當唔同資產嘅價格走勢有分別，就即係大家又要喺資產與資產之間做功課，唔可以淨係喺all cash同瞓身之間取捨。如果要作取捨，大家就要喺貨倉度攞番啲封晒塵嘅投資宗旨出來，又要做功課。歷來成功死唔去嘅投資者最重要嘅投資哲學，就一定係「眾人皆醉你獨醒、眾人皆醒你獨醉」。

如果要搵當今世上最「眾人皆醉你獨醒」嘅投資板塊，唔使問一定係美股，仲要係美國科技股，升到甩轆。美國有Twitter，特區都不甘示弱有騰訊（700），佢嘅市值已經超過利豐（494）、新地（016）、長實（001）同埋銀娛（027）。Sorry，應該係話騰訊嘅市值已經等同嗰四間公司嘅總和。係呀，總和呀！現價買騰訊嗰啲朋友，真係有我都冇嘅衝勁呀！

商品蓄勢大反撲？

咁「眾人皆醒你獨醉」呢？問我嘅話就一定係商品。金銀銅鐵冇人講，淨係得啲人話：「嘩！又創新低啦！」咁低成點先？喺1998至2008年嘅大升浪，好多新project投產，清一色都係成本非常高，要商品高價先頂得住。不過舊年已開始有大量消息話，好多新項目因商品「低」價頂唔順執笠。淨係運商品嘅波羅的海船業，喺2013年最好搵一環係拆船嗰邊。

再低息都谷唔到供應，運乾散貨嘅波羅的海指數都靜靜升。騰訊嘅市值已經可以買起恒生原材料業綜合行業指數所有公司嘅總和，幾次。2014年仲唔係商品大反撲之年？！